Раське- ве буесте чачозь ломанть, конат кортыть вейке кельсэ, эсист эрямолувост .Сон кезерень с-у. вейсень келень вал эстэнь , суоминь кельсэ ули вал рахва , сонз лувозо теке раське.
Буквально переводится как этнос, народ, нация .
Раськень Озкс- Кода содатано Озкстне эрсить кудонь, буень, велень, сехти покшось ды сюпавось эрьмесэ, те Раськень Озксось.
Адядо терявсынек панжомо те коенть сюпавдояк –сюпав домкачинзе, ды нама сонсь коенть лувонзо. Те Озкстонть башка лията Озкстне эрьсить эрьва иесте, кой-канататне натой мики знярыянь кирда иезензе. Раськень Озксось ютавтневи авуль сеедьсте, Покштятнень евтамост кувалма, архивсе уликс сермадовкстнень вельде, содави, те озксось вадря эрямо пингтнестэ ютавтневиль ведьгемень иес весть, даволов-казямо, чопуда пингнестэ, знярдо раськенек вельксэ гувныль зыянонь сультесь, Раськень Озксонть ютавтнильть седи сеедьсте, мейле тынь чарькодьсынк, мекс истя эрьсесь.
Сеть таркатнесэ, косо ульнесь минек Покштянок-Покшаванок Эрямопаксясь –Масторост, неень шкас улить кандозь модасто, вирь кужосо, лушмосо, лей чиресэ Март. Истят Март вастневить Од Паксясо дяк, Равонть Томбале, ков савсь шаштомс –оргодемс минек Покштятнене, васняяк вийсэ-верьсэ Христианствас совавтомадонть, Монастырьтнень ды Помещиктнень кедьалов понгомадонть, те сехти казямо стака ризксте пешксе пингетнестэ, минек раськенть вейке ризкс пельксэсь. Оренбург енксо, Северной буйсэ ули Ознума лей, конань ушодома лисьмаприненть чиресэ ули Маррашко ды содави сонсь Марось, куш малава вирьтне керязь ды модась соказь, ялатеке те Иневанькс тарканть сэрь-сулейтесь содави.Тесэ Озкстне ютавтневильть 20-це пингень ушодовома иетнестеяк.
Кодамо нильксэзе Мар валонть, седи видесте сонзе эряви сермадомс МААР. Нама мар валось вастневи рузонь кельсэяк, ды койкона келень тонавтыцятне ловить сонзе славянонь кельсте лисевксэкс, те а виде. Финно-угрань раськетнень кельсэ ули (маа, муу, мастор, мланде) вал конань смустезе мода, эрямо пакся, ААР –вал юрось маряви канды истямо лув эрямонть нилькс. Ней евтасынек МААР валонть истя –Иньванькс тарка косо эрямось, ютазьпингенть,неень шканть, икелечинть марто, сюлмави соньсь Инешкипазонть, Перьтпельксень кирдийтнень-ашийтнень ды Покштятнень-Покшаватнень эрьменть марто, нурькинесте мерьдяно ЭРЯМОПАНДО. Кезерень шкане Покштянок терявтнесть теемс истят Маарт, Масторост веси буетнесэ. Мекс те эрявсь? Нама чарькодицясь- чарькодьсы. Ваньскавтомс веси Масторонть теемс вейке, вейсэнь раськень эрямо пандо-пакся. Кемекстамс-вейсэндямс буетнень, теемс кеме Раське ды Мастор, Чаньстямс тень Инешкипазонть Эрьмесэ, Покштятнень-Покшаватнень эрямо содамочинть сюпавчисе, ды Перьтпельксэнть эвстьнень-вийтнень енксонь кирдийтнень-ашийтнень лезечинь кандомасост. Ютась меельце Раськень Озксось, ды сонзе Атянь Эземсе , сехти эрний-мельванома Покштятне вейсэ арселизь косо, знярдо ютавтомс сы Раськень Озксонть. Аравтнесть Прявт-Озатя, лездыцят тензе, ды Пазпалонь (штань, ярмаконь, ямксонь ды лия мезень пурныцят). Озкспалось, коень-коинзамга каявксось, Раськень Озксонть ютавтомга пурнавиль веси эрзянь буетнева –велетнева, эдь те вейсэнь тев.
Васняяк пурныльть састынькине шта, ярмакт, идем ракшань кедть. Штась эряви Пазштатолонь валомга, ярмактне- мезтне пурнавить букань, ревень рамамга, конатат мейле коинзась печкевить Озкспалокс, Озксонть ютавтомсто. Штатолось теевиль салава , кортыльть вирьсэ кекшезь, кияк илязо сода.
Те штатолось эрьсиль 40 пудонь сталмосо. Ютазь Раськень Озксонь штатолось кадови се буентень косо ютавтозель меельце Раськень Озксось. Сонзе кирвастелилизь Буень Озксонь ютавтомсто, ловови те штатолось канды покш вий. Покштятне евтнильть штатолонть кекшнилизь модапотс, ят-душмант илизь муе, эжели мусызь ды янгасызь-коласызь те карми покш пежетекс ды канды а онкставиксшка зыян кода буентень истя веси раськентень. Озкспалонь ярмактнеяк кекшневильть ды сынь куш кодамо аразьчи, стакачи авуль уле эрямосонть, а токшевить, эдь сынь алтазь Инешкипазонтень.
Вана кадовиль вейке ие од Раськень Озксонть ютавтома чинтень. Се велентень косо эрясь Прявт Озатясь пурнавильть Эрзянь Масторонть веси буетнесте Озксветийть,мельванома Покштят, Велень прявт, ды нама сонсь Инязорось, ютавтовиль Инекужо. Те Инекужосонть арсевильть сы Раськень Озксонть веси енкстне, аравтовильть веси буетнесте Прявт Озксветицянтень, буень Озксветийть, брагань теицят, букань ракшань ветицят, сюронь-ямксонь, медень пурныцят, седицят ды Куломанть каршо тюрема –шаштавтома коенть киштицянть –топавтыцянть. Загодсь арсевсть сеть кевкстематне конатат кармить ванновокшномо Атянь Эземсэ, цераксчис ды аваксчис од ломатнень совавтома коень ютавтыцят ды седи тов. Соньсь Раськень Озкс ютавтома таркась евтавозель, ансяк чись евтавиль таргодо икеле. Секс мекс иляст сода ят-душмант, лия раськень ломантне ды сынст азарьс ушмантне. Эдь седь шкатнесте душмантне теке кренчт, учесть кода сускомс седи тантей пелькс лия раськестенть, ды нама Раськень Озксонь ютавтома шкастонть эдь эрзянь ушмантне седи ламотне якасть Озксонь ютавтоманть ванстома.Куш виде эрьва велесэнть ятнень мельга ваныцят, ды ушмант кадновильть, илязо лисе зыян.
Ерьвата эрьзянь буетнесэ пурнавильть ломанть , улавт , лишметне наряжавильть лентасо, баягасо, каштазсо ды сыргильть сынь буень велетнева Озкспалонь пурнамо, Раськень Озкстонть яволявтомо. Икелев мольсь Озатя кедсензе Пазтешксонь палмань, ваксонзо кавто од церат конатат пувильть торамасо. Теть молицятнень-сыцятнень эрзянь велетнесте марилизь васолдо, ды Пазморо марто лисильть ломанте веленть куринкань ортатнес, кудотнень икеле анокстазельть моргат косо палсть кудонь-канонь штатолтне ды анокстазь озкспал-каявкс. Велень совама ортатнень икеле ютавтовиль а покшке озкс, кирвастевиль штатол.
Озатясь пшкадиль истямо озолма марто.
Инешкипаз! Веречипаз ! Чангодть!
Вана сынек, ознопалонь пурнамо,
Велень раськенть варштамо.
Вейсэнь Озксов, Пазонь кужов,
Велень эрийтнень минь тердтяно.
Ине Чанстесь, Ине эрьмесь,
Покштянь-Сырдянь Ине лувось,
Эрзянь велесэнть свал эрязо,
Чачи сюро, ракшань-ракша,
Эйдень-эйде, Шумбра рунгот,
Валдо ойметь ды Пазчангот,
Эрзянь велесэнть свал улезе.
Инешкипаз Чангодть! Паз Чангодть!
Эрьва канонь кудонь аватнень викшнезь пазнардамо лангсо кепедилизь верев Пазонтень алтазь кшинть ды серьгедильть «Паз Чангодть» пазморонть, сыргильть Озатянть ды озкспалонь улавонть мельга велень куринкатнева, ды тосо пурнавиль каявксось озкспалось (ямкст,алт, товт ды седи тов). Мейле знярдо те веси пурнавиль ды
евтавиль Озксонь чись. Пазонь кшитне путовильть Парьс нардамонек. Озатясь ды лездыцянзо велень ортатнень икеле сюкониль модас велень эрицятне ды мериль истя.
Сюкпря ды Пазонь Чансть ! тенк, мельванома раськеть,
Озкспалонк вадря ды анокстазь валдо мельсэ, вейсэнь Марось
Учи эйсэнк, пачкоде ды моледе, вейсэндяводо вейс веси эрзянь раськенть марто, кундасынек мирем Покштятнень лемест. Пшкадтяно вейсэнь Озолма Инешкипазонтень. Паз Чангодть!
Истя пурнавиль Озкспалось ды тердевильть эрзятне буетнесте.
Сась шка велень эрийтнень эсист анокстамост Раськень Озксонтень. Раськень Озксось ютавтневи сюконьчисте (пецясто), ансяк знярдояк ковонь прядовоманзо лангсо а ютавтневиль, те эрсиль пешксе эли од ковонь ушодовомасто.
Эрьва буесэнть-кансонть уштовильть Покштятнень лемест кундамга банят, ды нама эсист ломантнень дяк кода оймест истя рунгост улест ванькст. Те Покшчинтень алтавильть –анокставильть од мазыйстэ викшнезь оршамопельть. Банядо икеле азораватне анокстыльть Покштянь моргат (лемест кундамга). Знярдо чись ульнесь валгоманзо лангсо, банясь аноколь, буень-канонь сехти сыре –эрний ломанесь, саиль Озкспарго, озкскескав ды сыргиль калмазырев, косо калмазь раськетне ( эрзятнень ули истямо кой вейке буень-раськень ломантнень калмилизь калмазырьсэ вейке таркас, истямо коень гайтесь ули нейгак, мерьдяно Самара енксонь Пестравка буень Красная поляна рузонь велесэнть эрить 5 кудот эрьзят, ансяк калмазырьсе эрзятне калмить кулозь раськест рузтнеде башка ды эрьва канонть ули эсинзе тарказо), Покштясь ютавтыль озкске ды саиль эрьва канломаненть калмонзо лангсто коморонь –коморонь мода истямо озолма марто.( Тесэ эряви меремс седе калмазырев совамодо икеле ды тосто лисемадо мейле путневи озкспалне калмонь ортатнень икеле те Калмоньазоронтень, ды энялдыть чумочинь нолдамга мекс сыцясь колызе эсинзе самосо Калмазыренть ды кулыцятнень сэтьмечист).
Я, Инешкипаз, чангодть!!
Масторава- авинем,
Масторкирди- тиринем!
Иля тандат кеднедем,
Иля тандат пильгедем.
Састо нарот лутаса,
Тикшесаннэтнень явсынь,
Чевте модат таргаса,
Пацине потс каяса,
А томбаса, а правтса,
Вейсэнь Маронть лангс кандса.
Масторава –авинем,
Масторкирдий- тиринем!
Кода модань паморькстне
Вейке марс вейсэндявить
Истя эрзянь ломантне
Кадык раськекс пурнавить!
Инешкипаз, Чангодть!
Покштясь саиль мода мейле кудо –кардаз юртстояк. Кодамо лувозо те моданть саемась ды сонзе вейсэнь Маарс каямось.
Эрзянь раськень оймеежомарямочисэнть ды Пазне кемема койтнесэ истямо. Модась те вейсэндиця пелькс, куш косо иля эря ансяк тон свал сюлмавозят моданть марто, модась чачты-касты сюро, вирь, ды эрьва мезе, видестэ меремс модась те
кие вейсэнди куломадо мейлеяк.
Тиринь модась те нилькс-ундокс Покштятнень марто, чачума масторонок марто. Эрзятнень ули истямо коест, сыргить сынь лията таркав эрямо, тюрема паксяв, васоло килангов, свал саить мартос пацине потс тиринь мода, те пацинень ды моданть погавтисызь киргазост. Эжели чавуват тюрема паксясо, килангсо куломась сасатандат, тиринь модась вельтятанзат ды сюлматанзат раськень-буень унксонть-нильксэнть марто. Ды тиринь модась лезды теть ки лангсо, сон эдь чачума элестэть.
Модась саезь, веси канонь ломантне шлить Покштятнень лемест кундамга банясо, тердилизь-евтылизь лемест сынст парямсто, тест алтавиль башка теньсть, коната а токшевиль. Оршнильть ванькс од покшчинь оршамопельсэ, парямодо мейле кадыльть банявантень лаханс ведь ды теньсть кадык сонгак ды Кардаз –Сяркось дяк парить.
Кудосо аноколь лемень кундамга моргась. Кирвастевиль штатол ды ютавтовиль Инешкипазонтень ды Покштятнене озкске.
Валске , сеть кить молицят Раськень озксов велестенть, састынькине пуромильть велень куншка кужонтень. Эрьва буесь сайнизе мартонзо буйтешксонзо ( те мазыйсте керьсезь палмань конань верьце песензе Инешкипазонь тешксось, коната ашесь буенть тешксонзо ( эрьва буенть канонть ульнесь эсинзе тешксозо, мерьдяно овтонь, чувтонь керьсицянь, ривезь, письмар д.с.т.) ды ало сюлмазельть мазыйстэ викшнезь нардамот. Ушмантне понгавтнелизь сялгозост, чачума мастронь кисэ тюрематнесэ чавозь ятнень пря киськест (эрзянь кельсэ ули тандавтома –«Ва, пря киськеть сайса», икеле минек ушмантне самай сайнилизь прякискест ятнень ды понгавтолизь эсист сялгозост, паряк тесте саевсь –казевсь эрзятнене лем-покурдамка, куломань кандыця раське –мердинас (латинень кельсэ), кие соды, кода ульнесь сави ансяк Покштятнень евтамотнестэ пурнамс пельксэнь-пелькс раськенек пингень гайтензе содамочинть).
Се ушманось, конань сялгосонзо ульнесть сехти ламо ятонь прякиськет лововсь-яволявтовсь Маралякс. ( Теде тешкст-сермадовкст улить, ансяк историкенек кекшить тень, сепить, ансяк видечись знярдо-а знярдо лисни лангс. Раськень Озксов молиця нама сайнесть мартост ярсамопель, прякат, пешть, пидезь алт , сайнесть пеншт- вакант, нардамот, буень-канонь штатолтнень. Кудосто лисемадост мейле кадовикс азоравсь панжелинзе келес кардо ортатнень ды ведьпрясо валыль туема кист енов, ды мериль;
Инешкипаз Чангодть!
Вить пильгинесэ листь сынь кудосто,
Шумбрасто-паросто,
Вить пильгесэст ,
Мекев кудов соваст.
Кода ведьбрясь стамбаро,
Ваньксте масторавантень сови,
Истя кист улезе шожча ды шумбра.
Паз Чангодть!
Озксов молицятнень мекев велявтомазост ортатне ульнесть панжадот, кудосо кияксонть эзьть теньсекшне, эсть кодакшно-сустакшно, кист илязо тапаряво.
Знярдо Раськень Озксов велестэ молицятне пурнавильть знярыя улавт, лишметне нама чирькест мазылгавтозельть нардамосо, каштазсо, велень озатясь саиль торо ды теиль кавксонь кирда черть те покш улавонть перька. Мейле обозось сыргиль Пазморонь моразь, велестэнть, гагильть сэдильть седямо пельтне ( нудейть, гарзи, кайгат, чавумат, кальцяемат, пувамат, элекайгат( гуслят) ды с.т.) .
Кода коткудавт пурнавить пизезест, кода мекшт ливтить нешкентнень истя веси Эрзянь Мастронь енкстнесте чудезь-чудить эрзятне Раськень Озксонь ютавтома тарканть малава ашиця велетнес. Кши сал марто вастыть мельванома сыцятнень, раськетнень велень эрийтне.Эрьва кудосонть анокт максомс удома тарка, кши сал.Гай моли велетнесэ, тесэ евтнемат, аварьдемат куватьс вейкень-вейкень а неемадонть, морот, киштемат. Од цератнень ды тейтерьтнень сельмест прок сиянь покольнеть яла леднить, паряк мусызь вечкемаст. Веси мазыйсте –ваньксте оршнезь, туезь середицятнень ванныть содыйтне, ормань пичкавтыцятне, кинь ули мелезе каить содамотешкст (рунат) ды ногот. Удома арась, велестне теевить прок покш ошокс. Ансяк авуль веси наянгалить-элякалить, моли покш анокстама вандынь чинтнень. Ламобуень Озатятне, прявтне пуромсть вейс, веси парынестэ арсить мучкить весемезесь анок Озксонтнень ( Озкспалокс ракшатне,
Брагась, медьарвось, коень ютавтыцятне, веси те коенть енкстнень , ютавтома пелькстнень тагояк арсекшнесызь-аравтнекшесызь парынестэ.)
Знярдо чизе валгиль ускокшнызь ды стявтокшнызь тарказонзо соньсь Ине ПАЗОНЬШТАТОЛОНТЬ, анокстыльть тарадт, чувт лемень кундамга ямонть пидемга, сыньсь казантнень.
Венберть Прявтозатясь сувтамо толбарго марто ( сувтавга тонол лангс каильть цяпор тикше, пичень, кузонь сельведь –ой, костязь карво пангонь почт) ды колмо од тейтерть якстере поназь суре марто ютавтылть апародо идем эвстнеде пирямо-ванстамо кой. Икелев молиль Озатясь теиль те сувтамо паргосонть вить ендо керш енов колот, тейтерьте черень нолдазь якстере суренть каильть масторонть ланга, истя ютыльть Маркужонть перька теильть коло, мейле суренть сюлмилизь сисем сюлмосо. Прявтозатясь кадовиль Пазонть штатолонть вакс валскес, сон ознось, евтнесь кортавтомат, энялдомат-пшкадемат, кода Инешкипазонтенть, истя Покштятнене, ды Пертьпельксэнь кирдийтнене-ашийтнене.
Раськень Озксонь валске веси велетнесэ атякштнень моротнень марто гайгезевсть торамань гайтне, веси пурныть озномо. Озкспалонь букатне-ракшатне шлязельть, мазылгавтозельть цецянь каштазсо, ды сувтазельть-чанстязельть. Икелев мольсть кильдезь крандайзс лишмет , конатат теке ладсо мазылгавтозельть, улавтнесе сыгь усксть парьтнень брага, медьарво марто, веси озкспалтне вачкавильть парьга. Лишметнеде мейле моразь киштезь, ветвсть букатне-ракшатне. Веседе икеле мольсть эрнема-мельванома покштятне, Озксатятне, кши-сал, яндавасо медьарво, штатол, ды колмо тейтерьть озкспаргосто кинть ланга каильть –почодыльть комуля. Веси озксов сыцятне прок лей пурнавильть совильть Маркужонтень, шумбракстнить ды арсить вейкень-вейкень туртов Пазчангодт. Озксветицятнень лездыцяст анокстыть –аравтнить озкспалморгатнева, туевть озкспалтнень. Вейке сырькай моли кеменьшка тейтерь марто лисьма прянтень ютавтыть ведьавантень озкске, ды кармить кантлеме ведь, леменькундамо ямонть, кашанть пидемга ды седи тов. Озатясь карми тееме эрий тол. Саи кедезензе коське лазнеть карми езамо эйсэст , састынькине теть лазнетне ушодыть ченгеме. Озатясь ченгема таркатнень лангс
путы коське чевте тикшень паморькс, ды евты истямо Озолма.
Инешкипаз, Чангодть!
Толава, парава,
Сырнень тюс азорава!
Састынькине кирвазтя!
Шождинесте сыремтя,
Иля уле пултыцякс,
Иля уле чентицякс,
Ульть миненек лездыцякс,
Толпаргонь ушодыцякс,
Ульт валдонь максыцякс,
Раськень Озксонь
Толбандянь ушодыцякс.
Састо палт! Састо палт!!
Састо палт! Паз, Чангодть!
Озатясь сыремтьсы озксушодома штатолонть ды сырги кирвазтеме лемень кундамга ямонь- кашань пидема толбандятнень. Озатясь сувтасынзе аноксмар ракшатнень, брага, медьарво марто парьтнень, веси сень мезесь анокстазель Пазпалокс. Букань печкицятне анокстыльть букатнень. Озатясь сувтылинзе, мейле сынст ланга валовиль ведьпря ведь, эжели букатне састынкине сорнозевильть, те лововсь Инешкипазонть мельс тусь те озкспалось.
Букань печкийтне анокстазь пеельтнесе печкилизь ракшатнень, веренть нолдылизь модапотс Масторавантень, сывеленть керсилизь моргатне лангсо ды каилизь казантнева, кашаньпидийтне анокстыльть ливамо ямонть.
Окойники веси тораматне серьгедить эсь гайтсест , озксов сыцятне пуромить теить коло Инепазштатолонть перька. Маркужонть ниле енкстнесте (чилисема, чиньеле, чивалгома, пелеве) покш мазылгавтозь торо марто молить куншкас ниле церат, сынь панжить виень, эрьмень, эрямонь ниле енкстнень, пачкодить ды токавсызь торотнень штатолонть велькссэ . Те шкастонть Озатясь лездыцянзо марто чивалгома ендо кузи мар губорьксенть лангс сюкони ниле енов, кедьсензе штатолнесь, те шкастонть кармить чавомо гангипарьс, чавомас, кальцяемас, седить нудейсэ. Озатянть колмо лездыцят кепедьсызь верев Инепазштатолонть кирвастеме, знярдо толось токи штатолонтень ниле енксонь панжома торотне явовить. Пазштатолтне валовильть анокставильть свал истя, вельксэст мольсь пувордазь кикс енов (спиралеобразно). Веси раськесь пижакады колмоксть Инешкипаз Чангодть!
Веси Озксов сыцятне стить куманжа лангс,кедест кепедьсызь верев, Прявтозатясь ушодсы Ине Озолманть, конатань евты мельганзо веси раськесь.
Инешкипаз! Вере-Чипаз!
Тон, марицясь, кода тикше касы!
Тон, неицясь кода пеште панжи!
Неимизь, марямизь,
Сюконятяно пильгезеть,
Пшкадтяно валдо оймезеть.
Верев кепедьсынек кеденек,
Масторов нолдасынек сюкпрянок.
Ознотано эрицянок кис,
Ознотано раськенек кис,
Ознотано эйденек кис,
Паксясо видезенть кис,
Кардазсо ракшанок кис.
Инешкипаз!Макст тенек
Сэтьме лембе пиземеть,
Чачост-касост сюронок,
Касост-кепедевест тяканок,
Раштыцят, улест аванок,
Макст Масторонтень ладямо,
Вейкень-вейкеь вечкема,
Лисьмакс парот лисезэ,
Леекс эрьметь чудезе.
Кенкшпряваяк совазо,
Кеншалгаяк ютазо.
Минь Тонеть- Шумбракши!
Тон миненек –шумбрачи!
Ванстомизь, идемизь
Ятонь ломанде, ормадо-тармодо,
Апародо-зыяндо,
Даволдо-цярахмандо.
Вана пидинек ашо кеднесэ,
Вана панинек шожча мельнесэ,
Зяро кашасонть ямкстнеде,
Зняро макст эрьвантень ули паро.
Инешкипаз !Чангодть! Паз Чангодть!
Паз Чангодть!
Веси сюконить модас. Серьгедеви Пазморо Пазчангодть.
Мейле Озатясь терьдсынзе озныцятнень пшкадеме озолмасо Покштятнене –Покшаватнене, веси таго Озатяндонть мейле евтыть те Озолманть.
Эрзянь Покшт-Покштинеть,
Покштянь-Покшавинеть!
Сырк мерезе Покштинеть,
Матразь-оймазь киськиненк,
Раужо човаля модыненк.
Вана тердтядызь Озксов
Кши-салонок варчамо
Пурень-Брагань корштамо.
Ашо кедьсэ панинек
Шожча мельсэ пидинек.
Садо ваксозонок
Човоряводо юткозонок
Начтынк коське турвиненк,
Пештинк вачонь пекиненк,
Таньшкавтынк сэпей кургиненк.
Кинь лемезе кундави,
Кинь лемезе стувтови,
Илядо кежиявто,
Веси тынь-седейсэнек,
Веси тынь-минек верьсэ.
Минь тынк эйсэ лисинек,
Минь тыненк велявтано.
Садо, весе садо!
Илязт уле ве ендо ваныцят,
Иляст уле сельмень сявадыцят.
Пачкодезе, Молезе!
Паз, Чангодть!
Паз ,Чангодть!
Паз, Чангодть!
П
Озатясь серьгеди терди Эземозайтнень ( те сеть кить кармить кортамо кулозь маралятнень оймест пельде). Штатолонть малас пурнавить веси Эрзянь Раськень ды Эрзянь Масторонь , Маралятнень, Инязортнень мелест евтыцятне.
Васняяк лиси Тюштянь мелень евтыцясь –эземозаесь.Ды Тюштян оймензе пельде пшкади эрзянтнене. Мейле Озатясь серьгеди.
Пингеде –Пингес эрямо! Эрзянь Инязоронтентень Тюштяне!
Веси пуромозтне серьгедить ды вачкодить видь пильгсест модас.
--Эрямо!
Истя вейке-вейке мельга раськенть икельга ютыть веси содавикс эрний-мельванома раськетне.
Меельцекс Озатясь серьгеди.
Пингеде-пингес эрямо, эрзянь раськентень!
(веси)—Эрямо! Эрямо! Эрямо!
Ней сась шка Маронть одкстомтомга.
Маронть маласо умок учесь сокас кильдезь ды каштазсо , эрьва тюсонь кикскесе ды мазыйсте викшнезь нардамосо лишме. Соканть удало од цера ды кавто од тейтерть, лишменть ветить мар чирентень ды Пазоньштатолонть эстэ таргавить колмо кикст , ашо, якстере, равжо тюсонь, конат сюлмавить лишмень чирькентень. Якстере тюсось те Инешкипазонь, Чинь тюс- икелечинь эрямо, ашо тюсось те неень шкась улезе эрямось ванькс, раужось нама сюлмави Мастораванть ды Тоначинть , Покштятнень –Покшаватнень марто. Чилисема ендо икелев молить Прявтозатясь мельганзо кши-сал , брага марто лездыцят, мельгаст сырги лишмесь ды ушодови эрямочинь колонь теемась, сокасонть тееви модантень кикс, те киксесь прок соньсь Эрямо Колось, конань эзга ютыть веси озксов сыця раськетне, лишменть ютамсто морави «Пазчагодть» Пазморось. Окойники колось теезь. Ломантне стить вейке –вейке мельга чилисема ендо , васенцекс нама сехти эрний ломантне ды Покштятне , теке а сезевиця рисьмекс раськетне теить коло маронть перька ды эрьвась каи паргинестензе, пацине поцтонзо туевть моданть эрямотаркастост. Истя тееви Ине сюлмавксось Покштятнень, Инешкипазонть, ды Пертьпельксень кирдийтнень марто,раськесь вейсэндяви кода
вийтнень истя веси эрзянь ломантнень марто. Тееви кеме шумбра раське. Озатясь ды лездыцянзо чанстить эрьва ломаненть колонть теемадо мейле, Шумбракши палсо, ды
медьарвосо. Эрьватантень Озатясь мери – Инешкипазось Чангодезе теть Пазонь эйкакш! Пазчангодть!.
Састынкине Марось тееви покш губорьксекс, веси кемить раськенек виензы, ды кода кудонь- эрямонь истя оймень ванькс-сюпавчись покшолгады. Моданть каицятне, конатне чанстявтозельть састынькине кундыть кедьте-кедьс, маркужосонть тееви прок шкань сюлмавиця ды знярдояк а сезевиця суре-кикс. Маронть перька теевить знярыя ломанень кикст, конатне мейле веси маркужованть кармить вейсэнь, Пазонь моро марто тееме пурдавозь ломанень кикс, конатась васня келейгады веси маркужованть, мейле пурнави вейке покш петнявксокс .
Морыть морот , кода мерезель васняяк Пазморот ды раськень велемевтема-вейсэндявома морот, мердяно «Вейсэ, эрзят, виевтяно!» моронть, кондят , эдь те морось теевсь веси эрзятнене Тешксморокс. Адядо ледстясынек те моронть.
Вирев молян, (2-ксть)
Чувто керян, (2-ксть)
Сока теян.
Сока теян, (2-ксть)
Пакся сокан (2-ксть)
Кансть мон видян.
Кансть мон видян,(2-ксть)
Коцтке кодан, (2-ксть)
Панар викшнян.
Панар викшнян, (2-ксть)
Кужов лисян , (2-ксть)
Эрзят тердян.
Садо, эрзят, (2-ксть)
Садо, ялгат, вейсэнь моро моратано.
Вейсэнь моро , (2-ксть)
Моратано.
Вейсэ, эрзят, мазыйтяно.
Вейсэ , эрзят (2-ксть)
Мазыйтяно,
Вейсэ , эрзят , виевтяно!
Знярдо эрзятне пуромить покш петнявксос, веси серьгедить-«Инешкипаз! Чангодть! Минь тонь эйдеть, минь эрьзят! Минь Раське!»- ды кедест кепедьсызь верев. Мейле ломантне таго срадыть веси маркужованть.
Кармить анокставомо –топавтовомо койть-илат. Ней раськеть адядо схемасо невтьсынек мезе моли Раськень Озксто, Маронть одкстомтомасонзо, те схемась невтьсы сеть а неявикст, ансяк оймесе марявикст те коенть енксонзо, домкачинзе, сюпавчинзе.
Мейле Озатясь серьгеди – Раськеть ! Маронть одкстомтытне, Инешкипазонтень пшкадине, Покштянок-Покшаванок юткозонок тердинек.
Ней сась шка ютавтомс Раськестенть Куломанть шаштавтома-панема коенть.
Веси серьгедить- Панема, панема сонзе, туезе кадоссо минек раськенть.
Кужонтень лиси та косто апаро чамаксо, содов рудазов оршамосо соньсь куломатясь, кедьсензе чакш ды пеель конасо кальдерьсь чакшонте. Апаро вайгельсэ рангстась.
- Эрьга, те кие, ды кить терявтнить монь марто пелькстамо, монь панеме? Паряк тынь эрзятне? Варчасынек кие седи виев. Монь чакшось коськсь верьтеме, сась шка сонзе пештямс эрзянь ломанень верьсэ. Куломатясь чийни ломантнень юткова тандевтли эйсэст.
Састынькине ломантне теить эрий коло , колонть куншкас понги куломатясь, эрзятьне кеместе кундасть кедьте –кедьс. Куломатянтень те ломанень киксэсь а сезеви. Карми марявома чавомань ды гонгипарень гайть, куломатянтень та косто сырги сэрей од цера, ашо оршамопельсэ, мазый мизолдыця чамаксо ( эсить чамась эзь мереве невтемс куломатянтень, илятанзат мейле муе удомста так ки лангсто), кедьсензе гангипарь (бубен) ды кушаксонзо тонгозь мазый пеель.
Церась карми чавомо гангипарентень, чийнеме Куломатянть перька, ушоды кирьгавайгельсэ койморо, конатань кармить морамо сонзе мельга веси раськетне.
Вай я йех, вая-ваяя ваяя, эрьга раськеть, киштетяно,
Ваяя-ваяя, ваяя йех, ваяя йех Пазонь моро серьгедтяно,
Куломанть минь шаштавсынек, Куломанть минь паньсынек.
Вейсэ эрзят виевтяно, ваяя йех, ваяя ех, Пазонь Чанстесь мартонок,
Ваяя-ваяя, ваяя йех, киштеде-киштеде, морадо-морадо,
Ваяя-ваяяех вить пильгсенек тостядтяно, кеднесенек люкштядтяно,
Ваяя-ваяяех, тук эстенек кулома, оргодть тесте кулома, кулома.
Ваяя-ваяяйех , кадык ули чачома, кадык ули касома, ваяяйех-ваяя,
Эрзянь раськесь эрязо-эрязо, ваяя-ваяяя-ех, эрзянь коесь улезе-улезе,
Зыян-кажось туезе-туезе, ваяя-ваяяйех, свал эрямо улезе-улезе,
Ваяя-ваяяйех, эрьга мирем серьгедтяно, куломантень минь мерьдяно,
Седи васов тук эйстенек, иля токше тон раськенек , ваяя-ваяяех.
Шумбрачи-Шумбрачи, од чачума, Пазчангодт, кулома стувтык корот,
Тук эстенек седи васов, седи васов модамастронть потмос,
Ваяя-ваяяех , веси апаронть паньсынек, раськень ойменть вельметсынек,
Покштянок минь лецтясынек, Инешкипазонь эрьмесенть раськенек минь
Чанстясынек, ваяя-ваяяйех. Эрямо-эрямо, чачума-косома, Пазчангот! Пазчангодт !
Минь киштинек , минь морынек, куломанть эрзят изнинек ваяя-ваяяйех.
Эрядо, морадо, ойменк свал тынь ванстадо, эрзякс свал тынь уледе,
Ваяя-ваяяйех Инешкипазне кемеде, Шубра раськекс, кеме раськекс,
Свал уледе! Ваяя-ваяяйех Пазчангодть! Пазчангодть!
Неяви куломатясь тандадсь, койморонь морыцясь сонзо кундасы кутьмере ендо, куломатянть кедьстензе пры чакшозо ды пеелезе, сон карми энялдомо мартонзо пелькстыцянть икеле, ансяк вийкоень ветицясь чалги куломатянть мештес ды серьгеди лездыцят ертомс сонзо маронь кужостонть. Лисить ниле церат конатат кедьте ды пильгеде сайсызь куломатянть кандсызь толбандянть чирес, сайсызь чакшонзо-пеелензо, ноцковсызь лангстонзо раужо оршамопелензе ды чамаксонзо ерсызь толонтень, куломатянь налксицясь кекшсы чаманзо кедьсензе ды састынкине оргоди. Куломатянь оршамопельтнень паломастост, карми гайгемо наяна киштема моро веси киштить морыть серьгедить Пазчангодть!
Озатясь серьгеди_Раськеть! Адядо невтсынек эсь прянок Инешкипазонть ды Покштятнень , Кирдийтнень-ашийтнень икеле! Ушодтано ерокчинь ды каштанчинь пелькстамот –невтемат.
Пелькстамотнень ушодсызь од церынетне конатнень ламо иеть тонавсть ушмодеень ды лия церань тевень топавтома. Од церынетне леднить налтсо, ертнить торот, узерьненть, ды седи тов. Мейле Инязорось, буень –велень прявтатятне ютавтыть цераксчис совавтома кой.
Од церынетнень карксамост , карксавить карксо, прязост сюлмави цераксчинь кикс, казевить тенст налт, торот , тейтерьтне казить викшнезь кедьпатсинеть, килангонь кескавнеть, максовиль тенст омбоце лем, мердяно Каштан, Овтай ды седи тов . Сынь ней церат-ушмант, сынест те чистенть саезь мереви кинь ули мелезе урьвакстомс, ды прячерест а нарамс. Лововсь прячертне те вий, ды эрсиль эрзянь ушмантнень прячерест новолилить карязост витьс сынь ансяк сюлмавильть. Сехти ероков церынетнене казевильть ваксар.
Озатясь ды лездыцянзо сувтылинзе ды чанстилинзе. Веси церынетне стильть куманжа лангс. Озатянть кедьсе ульнесь штатол ды сувтамка сон евтыль истямо озолма.
Инешкипаз !Веречипаз! Покштят-Покшават!
Марямизь-неемизь, уледе мартонок.
Совасынек (евтавить церынетнень лемест)
Цераксчис, ванстаст ды ветяст сынь Раськенек,
Эрямо тевтнень, улест нарьдекс ды нильксекс,
Раськенть икеле чизензе. Ванстаст тиринь масторонть,
Эрзянь коенть ды Инешкипазне кемеманть.
Улест кеметь прок тумот, виевть прок овтот,
Превейть прок Покштяст ды тетяст.
Инешкипаз Чангодть! Паз Чангодть!
(Озатясь серьгеди церынетнене)
Аноктадо , тынь, улемс раськень кеме нильксекс?
(Церынетне мирем серьгедить)
Пингеде-пингес минь аноктато!
Озатясь сувтасы эрьвейкенть ды мери –Ней тынь церат!
Пазось чангодезе тенк!
Мейле сы шка невтемс эсь пряст ды ерокчист тейтерькатнене. Тейтерьтнене эрявсь невтемс кода маштыть викшнеме, кудонь тевень топавтомо, эйдень ваномо-нурсеме. Сынь веси тусь Раськень Озксов мартост тейтерь-паргот, косо ульнесть викшневкст, эрьва кедьенкст конатат анокставкшность сынст кедьсест. Те ульнесь прок неень шкане невтема (выставка), маркужось пешкедиль мазычисэ. Тейтернетне невтнесть кода эряви эйденть сюлмсемс, кода лавсень моро морамс, ды седи тов. Тейтерьнетнень аваст ды сырькаест те чинтень анокстакшность пулайть ды тейтерь прясуре. Тейтерьнетненедяк максовиль омбоце лем , мердяно сехти кодамо маштыцянтень путыльть лем Ламзурь ды седи тов. Велень Озаватне ды Прявтозатясь ютавтыльть тейтерьксчис совавтома кой. Тетерьнетне васенцеде сюлмавиль пулай ды прязост путовиль тейтерьксчинь прясуре. Те чистенть саезь сынь анокольть улемс никс-полакс, эдь сынь авань тевтнень пек лац маштыть топавтома.
Озатясь евтыль истямо Озолма.
Инешкипаз, Веречи Паз! Покштят-Покшават!
Немизь-марямизь! Пшкадтяно тыненк!
Ознотано икеленк.
Вана неинк эрзянь раськенть,
Эрзянь ломантнень чачтыцятнень,
Кудонь тевень топавтыцятнень,
Толонь каштомонь мельга ваныцятнень,
Коцтонь кодыцятнень, ведень кандыцятнень,
Мирьдень-Покштянь мелень топавтыцятнень,
Улест (евтавить веси тейтерькатнень лемест)
Пингеде –пингес , эрзянь авань тевень топавтыцякс,
Эйкакшонь чачтыцякс-кастыцякс, кудонь лембень кирдицякс,
Пазонь коень, Покштянь-Покшавань лувонь ванстыцякс.
Инешкипаз Чангодть! Паз Чангодть! Паз Чангодть!
Веси сынь сувтавить Пазштатолсо ды сувтамопельксэ.
Ней ушодсызь пелькстамотнень, ероксчист покш ломатне , тесэ бороцямот, налтонь ды торонь нолдамот, морамот-киштемат. Инязорось ды эрьний ломатне, Озатятне, кочкить ушмантнень ютксто сеть ушмантнень, конатнень торосост седи ламо ятонь прякискеть понгавтозь.
Сеть ушмантнене сюлмави Маралянь мазый каркс, казеви од торо, ды шлем. Раськесь Маркужосонть моры- кишти, содыцятне пичкавтыть ормат. Окойники маряви таго торамань гайть-увт, те пурнави Атянь Эземесь.
Атянь Эземс пурнавильть сехти эрний-мельванома ломантне, тесэ арсевильть ламо кевкстемат. Мердяно ладявильть буйтнень ютксо модань явома пелькстамотне, лангс ливтевильть сеть ломантне раськестенть кие тейсь кодамояк зыян, эжели кияк салась лиятань парочи, те салыцясь аравтовиль знярыя иес важокс, сетнене кинь сон мезияк салась, понгониль чевте тарка лангаяк кой мезень кисе. Эдь тесэ весемезесь ульнесь ливтезь лангс, эдь соньсь Инешкипазось, Покштятне-Сэрдятне, кирдийтне-ашийтне ульнесть озксов сыцятне марто. Ды весемезесь арсевиль мирем. Арсевкшнесь зняро сюро, ракшань кедть эряви каямс те эли тона буень пельде Масторонь тевтнень ветямга, Масторонь ушмонть кирдемга. Те ульнесь Ине промкс, Инекужо, эдь истят покш вейсэнь промкст эрсильть чуросто, паряк тесэ кочкавильть Ушмодейтнень прявтне, Чиняазортне ды сонсь Инязорось. Тесе кияк апак пеле кортыль седе мезе талакавсь седеензе, мердяно те демократиянь лув . Инжетне евтыльть сюкпрят те буень ломантнене косо ютавтозель те Раськень Озксось. Нама арсезевель сы Раськень Озксонь ютавтома таркась. Атянь Эземесь прядовиль, сыль шка Покштятнень-Сэрдятнень лемест кундамс ды ливамс, эдь аноколь лемкундамо ямось кашась. Састынькине ломатне ацыльть викшнезь руцят ацылизь Мастораванть ланга , озыльть ды ушодовиль лемень кундамо ливамось, цераксчис ды аваксчис совавтозь од ломантне якильть ды кайсильть лемень кундамо ямонть, кши-салонть, Озатятне, Кудонь Покштятне саилизь яндаваст штатолонть марто ды кирвастелизь сонзе Озкс Пазоньштатолстонть, эрьвась эсь пачкандо энялдсь Инешкипазонть икеле седе мезесь эрявсь тензе, чизе валгома лангсоль.
Састынькине Мастораванть лангсто пурнавильть руцятне, Маркужось ваньськавтовиль кодамояк чукш илязо кадово. Састынькине буень-буень ломантне таго теильть кавксо колот ознозь Маронть ды Пазштатолонть перька. Озксветицятнене ды сынст лездыцятнене евтыльть сюкпрят казильть казнеть, путыльть каявкс Озкспаргонтень . Истя прядовиль эрзянь раськенть сехти питней ды пешксе домкачиде валдодо Озксось –коесь. Нама неень шкань эрзятнене эряви ванстамс ды вельмевтемс сырнень човалятнесте, раськень ойместе, вейке пельксенть. Раськень Озксонь ютавтома коесь вейсэнди эрзятнень, невти минек сюпав коенек, ды сралезь-стувтозь оймеежомарямочинек. Раськень Озксось невти тагояк мерян эрзянь раськенть домка философиянзо, нама те озксось невти эрзятнень сеть шкатнестэ ульнесь вейсэньлувсо эрямонь демократиянь лув. Те сермадовксонть анокстамсто тень пек лездасть Маризь Кемалянь вешкневксензе-муевксензе, ды мейсеяк а онкставиця раськень вельмевтема тевензе, А.П. Рябов лемсэ эрзянь келень идема фондонть ломантнень Нуянь Видязень, Кшуманцянь Пиргужонь, "Торама» ансамблянть морыцятнень ды соньсь ансамблянь прявтонть Кавалонь Олонь.Вейкине Модамасторонть лангсо эрзянь раськень музеенть панжицянзо ды эрзянь раськень Пазне Ознома таркатнень ды кезерень калмотнень ванстыцянтень Аношонь Тумайне Обраненксонь Лукоянова ошсто. Модас сюкпря Покш Игнадбуень веси эрицятнене конатат ютавтызь 370 иень ютазь Чукалонь Эрямопандосонть 1999 иень Раськень Озксонть. Нама лездасть Шахматовонь, Евьсеевень, Печорскоень сермадовкстне. Ламось марязель Покшянь пельде. Критиктне, кадык пек алсто сард а таргсить, видечись сон а кекшеви, саты маньчемс эсь прянок, васняяк эрзятнене , минек раськесь истямо жо сюпав эрьва мейсэ кода лиятатнеяк эряви вешнемс веси паронть ды совавтомс эрямозонок, сестэ раськенть карми икеле чизе, вельмемазо. Ансяк веси вейсэ, мирем минь эрзятне виевтяно, мазыйтяно ды Инешкипазонь Чанстесь ды Покштятнень эрямо таштавт сюпавчись кармить ветямонок валдо Икелечинтенть. Пазчангодт , тенк , Раськеть.
