"Шумбрат, финно-угрия!" международной фестивальсэ Мордовиянь эрицятнень ды
инжетнень учи келей культурной программа
"Шумбрат, финно-угрия!" международной фестивальсэ, кона ютавтови июлень
19-21 читнестэ, Мордовиянь эрицятнень ды инжетнень туртов анокстазь келей
культурной программа.
Васенцеде панжсынзе кенкшензэ Мордовской национальной театрань од
зданиясь. Изобразительной искусствань музейсэ карми роботамо
финно-угорской народонь художникень произведениянь покш выставка, истяжо
ютавтови "Масторава" национальной оршамопелень покш модань (высокая мода)
гала-невтемка.
"Город мастеров" выставкасо невтьсызь викшнемкатнень, човалясто мазый
кодавкстнэнь ды истяжо севоньстэ, илевсто теезь а евтавикс кедьенкстнэнь.
Эрьва ломанентень сынст аволь ансяк мисызь, но икелест чачить искусствань
од произведениятне. Мастертнэ невтьсызь, кода теить кедьенкстнэсэ.
$IMAGE$
Национальной велесэ, кона панжови "Старт" стадион икеле, ломантнень туртов
пидьсить финно-угорской народонь национальной ярсамо ды каванямо пельть.
Истяжо Республика Мордовиянь районтнэсэ ды Саранск ошонь сехте покш
сценической площадкатнень лангсо кармить ютамо профессиональной ды
фольклорной коллективень концерт. Сыре Теризморга велесэ панжови
национальной культурань ды музейно-этнографической комплексэнь Центра,
конань вельде тевс нолдави Мордовиянь этнотуризмась. Тезэнь теить кезэрень
шкань кудо, косо эрсесть мокшэрзянь семиятне, а ваксозонзо путыть кардаз,
баня ды лисьма. Кинь карми улеме мелезэ, кадык вачасы эрямс кезэрень
пингень кудосонть ды шлямс пси банясо, кона уштови, рузокс меремс,
"по-черному".
Фестивалень эрьва участникенть туртов анокстазь мокшэрзянь
декоративно-прикладной творчествань ламо сувенирт. Мероприятиясонть истяжо
кармить микшневеме фестивальной символика марто кедьенкст, современной
национальной музыка марто дискт.
| 
